ஆசைகள்

வறுமையில் ஆசைகள் 
பூமிக்கு அடியில் புதைந்திருக்கும் வைரங்கள்!

பாரம்

பள்ளிப் புத்தகப்பை பாரமென்ற புலம்பலுக்கிடையில் 
வாழைத்தாரையும், முட்டைகளும் சுமந்து சம்பாதித்துவிட்டு 
பள்ளி செல்லும் சிறுவர்கள்  

வேடிக்கை உலகம்

ஜன்னலோரப் பயணம்

வேடிக்கைப் பார்க்கும் சாக்கில் 
அவரவர் உலகத்தில் ஒளிந்துகொள்ள

பிளேபாய் (Playboy)

பத்துப் பொருத்தங்களும் வேடிக்கைப் பார்க்க 
தினம் ஒரு விதமென ஜோடி சேர்ந்தான் பலரோடு 
எவரொடு சேர்ந்தாலும் தன்னிலை மாறாத பிளேபாயாக தயிர்சாதம் 

தண்டவாள எண்ணங்கள்

இரயிலில் ஜன்னலோரப் பயணம் 
அசைப்போட்டது மனம் பலவற்றை 
மாறி மாறி செல்லும் தண்டவாள எண்ணங்களாய் 

இதம்

ஜன்னலோரப் பயணத்தின் சுகம் வேடிக்கைப் பார்ப்பது 
அந்த சுகத்தில் இதம்
அழகான ஆடவனை நிறுத்தத்தில் காண்பது 

கன்னக்குழி

அவன் புன்னகைக்கையில் புதிதாய்த் தோன்றிய கன்னக்குழி 
சத்தமில்லாமல் சொன்னது 
அவள்  முத்தத்தின் ஆழத்தை 

சூப்பர் ஸ்டார்

இளம் ஹீரோக்களுக்கு மத்தியில் 
மவுசு குறையாத வயதான சூப்பர் ஸ்டாராக திருப்பதி லட்டு

அரசியல்

பேதங்களில்லை என்ற மேடைப் பேச்சு 

நான்கு சுவருக்குள்ளே "நம்மாளுங்க மட்டும்" என 

உள்ளொன்று வைத்து புறமொன்று காட்டிய அரசியல்வாதியாய் கொழுக்கட்டை 

கலப்புத் திருமணம்

சில்க் ஸ்மிதா போன்ற அழகு அவள் 
அவளைக் கண்டு உருகும் வெளிநாட்டு மாப்பிள்ளையாய் அவன் 
சொர்க்கத்தை நினைவூட்டும் ஜோடியாய் வலம் வந்தனர்

குலோப் ஜாமூனும் வெண்ணிலா ஐஸ்கிரீமும்

வெட்கத்தின் நிறம் ரோஸ்

புதுமணத் தம்பதிகளாய் முதலிரவு அறைக்குள் 
வெட்கத்தில் அவள் முகம் பூசிக்கொண்டது மெலிதான ரோஸ் நிறம் 
கலவியின் உச்சத்தில் உருவானது பால் பாயசம் 

குழப்பம்

கருப்பர்களும் வெள்ளையர்களும் 
இணைந்து வாழ முயற்சித்ததன் விளைவு 
குழம்பிப் போன குளம்பி எனும் காபி 

சிவந்தனள்

கூட்ட நெரிசலில் 
எங்கிருந்தோ கைகள் தன் வளைவுகளைத் தீண்ட 
சிவந்து கொதித்தெழுந்தாள் கைமுறுக்கு 

துரோகம்

சிதைந்தது  நம்பிக்கை கற்பழிக்கப்பட்டு 
அலைந்தது மனம் அம்மணமாய் 
நிகழ்ந்திருந்தது துரோகம்

படிக்காதவன்

பாடத்தை கவனிக்காத மாணவன் 
அரைகுறையாய் செய்த வேலை 
அரைவேக்காடு முட்டை

உணவுக்கலவி

இருவரும் உரசிக் கொள்ள
உடல் கத கதப்பில் மெல்ல
வெண்ணிற ஆடைத் தகர்த்து
பொன்னிற மேனி வெளிப்பட
அரங்கேறியது ஒரு தோசையின் பிறப்பு

விதவை? மறுமணம்?

எப்பொழுதும் வெள்ளை ஆடையில்
விதவையாய் அவள்!
மறுமணத்தின் முயற்சி - பொடி இட்லி

துர்நாற்றம்

பலமுறை முகர்ந்துப் பார்த்தான், கலவிக்கு முன் 
தன் மீது துர்நாற்றம் வீசுகிறதா என்று 
முகம் சுளிக்காமல் சாக்கடை தூய்மை செய்பவன்

காதல் செய்வீர்!

காதலிக்கும் ஒவ்வொருத்தருக்குள்ளும் 
கவிதத்துவம் பிறக்குமாமே!
ஆதலால் காதல் செய்வீர்!

இனிப்பானவன்

அவன் ஒரு சர்க்கரை பிரியன்  
ஆதலாலேயே உடல் பெருத்தான்  
அவன் பெயர் "ரசகுல்லா" 

ஆறுதல்

புரிந்துக் கொண்ட  
இருவரின் உறவுக்குள் 
மிகப்பெரிய ஆறுதலாய் மௌனம்! 

காதலர் தினம்

காதலைத் தன் மைக் கொட்டி எழுதிய பேனாவும் 
அதைச் சுமந்துச் சென்ற காகிதமும் 
காதலர் தினம் கொண்டாடியது, அவர்களுக்கானதென்று 

ஜன்னலோரம்

தினசரி பேருந்துப்  பயணம்
அன்றைய இமாலய வெற்றி
ஜன்னலோர இருக்கை 

காக்கை

காக்கைக் கரைந்தது 
விருந்தினர் வருவர் என்று சொல்லிக் கடந்தனர்
காக்கைக் கரைந்தது பசியோடு 

சுமைதாங்கி

எழுதாத பேனாவும்
எழுதப்படாத  காகிதமும்
சொல்லப்படாத காதலுக்குச் சுமைதாங்கியாய்!

தகப்பன்

சிற்பி வடித்த சிலை கடவுளாகக் கோவிலில் 
தரிசித்தான் தூரத்திலிருந்து
தத்துக் கொடுத்த தகப்பனாய் 

முந்தானை

எப்பொழுதும் திட்டிக் கொண்டே சாப்பிடும் அவன் 
பேசாமல் பரிமாறும் அவள்
கைகழுவியதும் தேடுகிறான் அவளின் முந்தானையை

வாழ்க்கைத் தத்துவம்

முடித் திருத்தகங்கள் சொன்னது 
ஆழமான வாழ்க்கைத் தத்துவம் 
மயிராப் போச்சு! 

உரை

ஈரடி குறள் 

உரைநூல்கள் பல 

தீராத தாகமாய்

தாகம்

தண்ணீர் கேட்டாள் 
தன் தாகத்திற்கு 
மோர் விற்கச் செல்லும் பாட்டி 

ஒழுக்கம் தவறாமை

பெற்றோர்களின் காலை நேரத்துச் சாலை விதி மீறல்கள் 
பள்ளி சிறுவர்களின் 
நேரம் தவறாமை ஒழுக்கத்திற்காக !

ஹைக்கூ

மூன்று வரி கவிதை
அதன் இலக்கண வகுப்போ 
நீண்டது ஒன்றரை மணி நேரம்!